ASTRONAUT PAWL HRANG TIH A NUNG ZET MI SPACE HNAWMHNE TI FAI TU DING SPACECRAFT “REMOVEDEBRIS”

Boruak par ihsin kan leilungpi a hel rero tu hnawmhne pawl ti fai tu ding ah washing machine tia hrawng spacecraft “RemoveDebris” an tuah mi cu an ttheh thlang ih tu kum sung ah hna a ttuan thok thlang ding.

Hivek space hnawmbal pawl hi Rocket le satellites kan thlah mi ih a suak mi hnawmhne an si ih million hrek hrawng a um. Hi hnawmhne pawl hi spacecraft, Satellites le astronaut pawl hrangah a tihnung zet.An pah ngah pang ah cun accident nasa tak a suak thei ih thih le hlohnak tiangin a thlen thei.

A hnattuandan ding cu hnawmbal fate deuh pawl cu meisa thawn a ti ziamral thluh ding ih a tum deuh cin cu ngate sur an vorh nak vek net thawn a kap ding ih kan leilung thawn a hlatnak hmun ah a hlawn ding.

Leilung ih a suak ah NASA pawl hrang an ttulhei mi thilri a phur sak ding ih International Space Station ah a tthumaw lawk ding. Cuhnu ah a hnattuan nak ding hmun ah thlah a si leh ding.

Surrey Space Centre, UK pawl hoha in University of Surrey ah an tuahmi a si ih a tuah man ah £ 15 million hrawng an cem.