CET LILAWN ACCIDENT RUANGAH A TUAHTU COMPANY IN CAWHKUAN A TONG (+VIDEO)

Hongkong shopping mall cet lilawn (escalator) accident thuthawn pehpar in cet lilawn tuahtu Otis Elevator Company cu Hongkong dollar $320,000 (US$40,800) kuan dingin thu an relcat sak.

Hih accident nak hi kan dungkum march thla, Langham Place Shopping Mall ih cang mi a siih mipum 120 hrawng cet lilawn thawn so lam ih an kai lai cu a cawl thut ih suk lam ah cak zetin a her aw. Minung 120 pawl cu lilawn tawrawn ah an vung pah pengaw ciamco ih minung 18 in hrimhma an tuar phah. Mi pathum sizung an to ih pakhat cu a luvun hik ruangah voi 21 an ṭhit. Kum upa lam nunau pakhat khal a thinphang ah a thluk a buai ih zerhhnih sung special in an enkol.

An cet lilawn hi thla tinten check ringring mi a siih accident a suak nak cet lilawn khal cu casung ih record an nei mi ah cun 2017 march thla ah check in a ngan aw. Asinan CCTV record mi an zoh sal tik ah a an check lai awmang hmuh ding a um lo. Curuangah hnaṭuan dawngdah case in an fehpi ih cet lilawn a tuahtu Otis Elevator Company cu Hongkong dollar $320,000 kuan ding in thu an ṭhen sak.