CHINA RAM CUN NIKHUA CONTROL NAK CEET A HMANG THOK TUM

China cun a ramsung mipi, tidai khawpkham takih inding an neih thei ringring nak ding ngaih tuah in nikhua control theinak ceet a rak tuah dah. Cuih ceet pawl cu test nak an nei zo ih an tumtah vekin hna a ṭuan thei ruangah hivek ceet dang thawngteel in tuah bet an tum.

Inding tidai an lak nak dawhhna, Tibetan tlaangpar ah tuah an tum ih Spain ram hnak ih letthum tum mi (620,000 square miles) hmunram a luah ding. An hman dingmi ceet cu ralkap pawl ih hman mi rocket engine technology thawn an tuah ding ih cuih ceet cun a sang lam 16,400 feet hrawng ah ruah suurter theimi chemical a thlah ding. Ceet ih ur mi silver iodide pawl cu mero sung ah (cloud-seeding) an lut dingih vuur khal vekah an cang ding. Cumi mero lak ih vuur khal pawl cu a rit tuk ruangah vansang par ah a um thei nawnlo dingih leilung lam a pan in a tlak hnu ah ruah suur mi ah a cang ding. An tumtah mi an hluhsuah le himi ceet pawl ih hnaṭuan nak in kum 1 ah tidai 10 billion cubic metres a suak ding.

Himi ceet tuahtu lak ih telve researcher pakhat cun,”Tibet ram alpine slopes ah hivek ceet 500 luan hmang in test nak kan nei zo ih kan tumtah vekin kan hlawhtling ding a bang” ti`n a sim.

Nikhua control tivek a cang thei ngai pei maw?
Cang thei..
2008 Beijing Olympics on-puai ni ah meisatleu an kap mi (fireworks) fiang mawi takih lang thei ding in stadium tlun ih zaam mero, suumzing pawl cu chemical phur rocket 1000 luan hamng in an rak tifai dah.

Vietnam raal lai khal ah US cozahpi in Vietnam ramsung ruahsuur theilo dingin varpar ah chemical nasa takin an rak thlah dah.

 

Zohṭhimmi pawl:::CGTN, HongKong Post, Reddit