CHINA SATELLITE SIATMI LEILUNG PAR AH A TLAK CING THLANG DING

September 2017 ihsin an control theinawnlo mi china satellite Tiangong-1 cu March lole April thla hrawng ih lei par rung tlak ding in space lam ih hnattuan china experts pawl in zumnak an nei.

Leitlun hmun dangdang ih hnattuan Aerospace agencies pawl in thlingthlaknak an nei ringring ih European Space Agency cun Europe ram lam ih a tlak ding zumnak an nei thu an phuang. Minung tuahmi thilri space par ihsin rung tlak ruang ih hriamhma tuar tuni tiang record cu a um hrih lo nan, Tiangong-1 cun minung hrang ih tih a nung zetmi chemical a phur ter ruang ah an thin cu a phang deuh.

Tiangong-1 hi 34 feet (10.5 meters)hrawng in a sau ih 11 feet hrawng in a tum. Leilung par a thlen hlan, atmosphere ah meisa alh ah a cang ding nan 10-40 percent hrawng cu siat lo in leilung par ih tlak ding zumnak an nei.