Falam khuasung ah Ki-law pawl a burbur in an lut

June 6 zaan le June 7 zinglam ah Ki-law (vate) pawl a burbur in Falam khuasung ah an lut tiah theih a si.

June 6 zaan nazi 9 hrawng ihsin vankau tlaang, FBC biakinn kiangkap le Balai veng tlunvan ah an zam ciamco ih an ai awn tla cu a ringzet tiah a theitu pawl cun an sim.

Awnai a theitu zingpit thlacam fehtu pitar pakhat cun, “Lai daan ah atu bangtuk in Ki-law pawl khuasung ah a burbur in an lut a si le tlaang ah raal pawl an ra tinak a siih nehnak ding hrangah napi`n thlacam daan a si” tiah a sim.

Myanmar vate pawlkom ih ṭuanvo neitu U Myint Swe hnen ah CH daily news in thu an sut tik ah, “kan ram ih nikhua thleng aw caan a kim tikah vate pawl hmunkhat ihsin hmunkhat ah an umhmun an thleng aw ringring. Thlatang ih umhmun a ṭhawnmi vate le atu bangtuk Fur caan ih ṭhawn awmi vate, ṭhaal caan ih hmun ṭhawnmi vate tiin a tlaangpi thu in phunthum kan nei” tiah U Myint Swe in a sim.

CCIT tlawng sayakyi Rev. Dr. Joel Za Hlei Kap cun, “Fur caan cu Ki-law suahvah caan a si. Hramlak ah ei ding ṭhiṭha a um nawnlo ruangah inn an pan tla a si thei. Cun, khuasung ah vate kan saai nawnlo vivo, eco friendly life kan si deuh vivo tikah milai umnak inn lam sawn ah himnak an hawl tla a si thei” tiah a sim.

Chinland Herald Daily News