Falam luhnak hauhnaar ah pi 25′ saangmi THINGLAMTAH an phun ding

Falam khua leiram damnak ding le Christian khua sinak lang tertu ding tumtahnak thawn pi 25′ saangmi thir Thinglamtah cu a reihlan ah Sun Ceu khaan kiangah an phun thlang ding tiah theih a si.

Chin Theological Fellowship (CTF) cun hih thu cu Falam khua nu/pa hnen ah thuron a sim tikah ṭha an tiih June 5 ah tonkhawm thurelnak nei in Thinglamtah phun dingah hmalaaknak an nei cihmi a si.

Atu ah, Thinglamtah phun siannak cu uknak lam zungih vuanthok bawi hnen ah an dil zo ih vuanthok bawi cun, “Lamziin zung ih feh sukso a hnaihnok lo timi lungkimpinak le Cinmual venglal ih kiangkap a hnaihnok lo timi theihpinak ca an pek ahcun a ngah ko” tiah a sim.

Falam khua nu/pa in a phunnak ding hmunhma lam ṭuanvo laaknak an nei ih Congheng khuabawi le Locom khua pawl hnen ihsin khal siannak an ngah thluh zo tiah theih a si.

Thinglamtah cu pheilam ah pi 2′, a kaulam ah pi 1′ tummi a siih fek te ih a din theinak dingah leilung sungah pi 9′ an phum dingih leilung parah pi 25′ a saang dingmi a si.

A thlanglam ah leimin kham dingin cangdawl khal an tuah zo ih Thinglamtah khal a hmun ah ret zo a si na`n siannak ngah tikah phun leh dingmi a si tiah ṭuanvo nei Rev. Salai Sen Ro Sang in a sim. Amah cun, “Thinglamtah phunnak ding hrangah ting 30 hrawng a ṭul ih atu ah ting 7 lawng kan nei lai. Asinan Falam khuapi luhnak ziin sak le thlang ah biaknak dang ih hminsinnak pawl a um tikah Falam thleng dah lotu khualtlawng sukso pawl cun Buddhist khua ah ruat a olmi dinhmun kan si. Curuangah Falam khuasuah hnaar ih Thinglamtah kan phun theinak dingin zumtu unau zate in thazaang suah cio dingah ka lo sawm hai” ti`n a sim.

Falam khua nu/pa sungṭuan Pu Khuang Hnin khal in, “vuanthok bawi hnen khal in siannak kan ngah cing ko ding. Asinan leiba ih Thinglamtah phun cu a remcang lo ding ruangah FCMF, FCC le FECF pawl hohanak in Pathian ram hrangih siannak a neitu ṭanpinak thawn ting 30 a kim tikah phun leh a ṭha ding” tiah a sim ve.

Atu ah lamziin zung vuanthok bawi le Cinmual venglal cun phun dingah an lungkimpinak ca an pek zo.

Chinland Herald Daily News