Falam palik bawi si vekin mibum hmang an um

Falam khuasung ih ummi palik officer ka si tiin phone top up thun sak dingin bumnak pakhat a cang tiah theih a si.

June 10 ah Tlanglo venglal Pu Za Nei Ling hnen ah, “Falam palik officer U Than Naing ka si. Meeting kan tuah lai ih nikhua sia thawn phone bill 20000 man in thun sak ta aw” tiah a simmi cu an zingzoi saal tikah Falam palik officer U Than Naing si loin, mibum pakhat a si tiah an thei ngahmi a si.

Cuvek thotho in Cinmual venglal hnen khal ah bum a tum na`n Cinmual venglal cun U Than Naing ih aw a si lo zia a thei ruangah kuat sak loin arak um ti a si.

Farṭhawk venglal hlun Pu No Bil Sum hnen khal ah paisa 80000 a rak thun ter dah na`n Pu No Bil Sum cun phone ihsin thun sak loin top up pawl a va keng sak tikah palik officer ngaingai cu mangbang in a um ti a si.

Curuangah mipi pawl khal in phone sung ihsin bill thun sak dingih bomnak tong lo dingah ralring cio dingin ṭuanvo neitu pawl in thu an than.

Chinland Herald Daily News