FALAM PENG SUNG IH THINGFIR PAWL KAI NGAH

Falam peng nisuahnak lambik ih a ummi Thiamthi khua kiangah thing fir mipum 12 an kaai ngah. Falam vuanthok bawi U Soe Lwin, MP Pu Ral Hnin, nah-ṭah-lah U Ye Min, Webulah ih thingram zung ṭuanvo nei 2 le palik 2 pawl thawn Feb 5 zaanlam ih bial an fangnak ah Buk tiva thlun kap ah an kaai ngahmi a si.

Tukum sungah Falam peng sungih thingfir pawl an kaai ngah hmaisabikmi a siih hih hmun kiangkap ah Kalay peng sung lam ihsin thingfir an um ringring ti`n vuanthok bawi U Soe Lwin in CH hnenah a sim.

U Soe Lwin cun, “kan dung kum ah voi thum kan kaai zo. Atu kan kaai ngahmi cu mawṭaw 2, caw leeng 2, caw 4 le mipum 12 pawl an si. Thing tluan ziat a si timi cu thingram zung ṭuanvo nei pawl in an check rero lai. Tluan 500 luan cu a um ding ka zum. Feb 5 zaanlam nazi 6:30 hrawngah kan kaai ngahmi siih Kalay peng, Ṭaung si khua le Myauk si khua lam ih um pawl an si. Hlawhfa ṭuan an si maw, a neitu an si maw tipawl cu zingzoi rero lai an si.Ṭhiamthi kiangih Angṭeng khua thingram zung ṭuanvo nei pawl in pakhat hnu pakhat an zingzoi rero lai ah kannih Falam ah kan ra so” tiah a simmi a si.

Thingfir pawl cu vuanthok zung lam in thingram zung ṭuanvo nei pawl hnenah an ap zo ih thingram daan vekin thuṭhenzung lam ah an kuat sin ding tiah theih a si. Falam peng sungih thing mankhung pawl hloral men lo dingah atu vekin bialfangnak neih bet a si hrih ding ti`n CH in a tarlang.

ref:::CH