HNAM THLEIDANNAK RUANG AH TLANGVAL KUM 23 MI, MIPI HMAI AH THAT TUAR

Hnam, phungsang, phunniam thleidanaw nasazetnak hmun Delhi ah namte hmang in mipi hmai ih thatawnak a suak.

That a tuartu Ankit Saxena (23) hi hindu miphun a si ih Muslim fala a nei mi innsungsang pawl in Tagore Garden metro station mipi hmai ih namte thawn an dawt that mi asi.

Police report mi vek asile Saxena le a falanu hi tuhlan kumhnih luanzo ihsin an duhaw thokzo ih a nunau nu sungkua pawl in rem an ti lo ruangah an um nak hmun tiangin an ṭhawn aw. A leng a suak ding khal le a hmai khuh ter in mi pakhat tal an thlunter ringring.

Pasal nei thlang ding asi ruangah a duh taktak mi Saxena thawn metro station ih tongaw ding in an phone aw. Nunau nu cun a sungkua pawl thlunding phang in a pa le a u nau pawl innsung ah tawh a kharhkhum. Vansiatnak ah a nu a ra tlung ngelcel ih a pa le a unau pawl cu sangka a ong hnu ah Saxena cu an hawl.

Ankit Saxena
Ankit Saxena

Saxena cu a falanu hnen a thlen hlan lamzin ah an man ih kan fanu khawi ah na thup ti`n mipi hmai ah namte thawn an dawt cih ih a hngawng an hlep. A falanu cun ka tlangvalpa a thi ti a theih veten police pawl hnen ah ka sungkua pawl ih thatmi asi ti`n a report ih a pa, nu le a pu cu an kai cih. Fala nu cu thuthup police hnen asim ruangah a pu rualpipawl ih that ding phang in police pawl in an safehouse ah an thup.

An thuhla theitu mipi pawl cu falanu sungkua pawl um nak inn hmai ah feh in a zamrang theitawk ih thu ṭhensak dingin duhphawrhnak an nei ih police pawl an buai celcel.