India in Falam khua karh hnaṭuan hrangah Kyats 4 billion in a bawm tum?

India cozah in Chin ramkulh ṭhansonak hrangah sumpai bomnak a pek tum ih Falam khua karh hnaṭuan hrangah kyats 4 billion (taan 4000) a tel ve tiah theih a si.

Asinan cuih bomnak sumpai hmannak ding daan ah Falam municipal zung pakhat lawng in ṭuanvo laak in pyi-ne lam ah an kuat ih Falam khua karh project committee pawl in zianghman an thei man lo ti a si.

Falam khua nu/pa hotusang Pu Rul Zam in, “Falam hrangah India ihsin bomnak ngah ding tivek thuhla a um ti hman kannih cun kan thei lo” tiah a sim. Falam siipin ṭuanvonei pakhat cun, “Hakha ihsin Pu Hlawn Sa Vung amah rori ra in kan zung engineer pawl thawn thuhla zoh tlaangnak an nei” ti`n a sim ve.

Pu Hlawn Sa Vung khal in, “India in bomnak pek dingah kutza an sanmi men a siih kei nih cun taan 25 lawng a pek ding ti`n ka thei. Cuih taan 25 hman cu Chin ramkulh ih township 9 ah ramkulh cozah in zem in hmang ding a si lai tiah ka thei” tiin a sim.

India cozah cun Pu Hung Ngai san lai ah tla Chin ramkulh ṭhansonak hrang bomnak pe dingin an kutza an san dah na`n a taktak ah an pek loih hnaṭuan dingih tiimlaam tuah ciami pawl a lak ah a cang thluh ih bangthlak men a rak si dah ruangah atu khal ziangtluk cin tiang zum a theih ding ti cu rel a theih lo ti`n Pu Hlawn Sa Vung cun a sim hrih.

Falam vuanthok bawi U Soe Lwin cun, “Falam khua karh thu thawn pehpar in ramkulh cozah ih theihpi mi committee felfai a um zo ih a dotdot in ṭuan vivo dingmi a si. Atu ah Falam khua karh hrangah tiin municipal zung in estimation an suaimi cu a feh daan a dik lo. Ziangahtile lamziin cek ding, culvert tuah ding tipawl a siih Falam khuakarh hmunhma hrangah committee in leiram laak felnak hnaṭuan hman thok hlan ah lamziin cek tivek tuah ahcun lehhnu ah thubuai a hnok vivo leh theimi a si” tiah a sim ve.

India ih bawm ding maw, ding lo a fiang hrih lomi hih budget thu ah Chin ramkulh cozah hnen ih Falam khuakarh project hrangah minicipal zung lam ih ruahhmannak an neimi pawl cu:

– Rih lamziin le Tili lamziin pial ihsin Lungrang ih cozah zungkom hmun tiang pi 35 kau, peng 7 sau lamziin ceknakding hrangah ting 7000

– Lailun ihsin Laimual tiang pi 34 kau, peng 4 sau lamziin ceknak hrang ting 4000,

– Ṭhio Aa nu khaan ihsin Sunthla lam in Falam fehnak lamziin peng 2 sau, pi 24 kau cu pi 10 ih kauh betnak ding hrang ting 2500

– Ṭhio Aa nu khaan ihsin Sunthla lamziin peng 2 sau, pi 18 kau concret phah ding le lungto lihong dawl ding hrang ting 21350

– Zalai khua thar ihsin Laizo khua thar karlak peng 2.2 sau lamziin pi 24 kau ah pi 10 kauh bet ding hrang ting 2000

– Zalai khua thar ihsin Laizo khua thar tiang, peng 2.2 sau, pi 18 kau concret phah ding le lungto lihong tuahnak hrang ting 24000

– Ṭhio Aa nu khaan ihsin Rialti fehnak peng 5 sau, pi 34 kau lamziin ceknak hrang ting 6000

– Ṭhio Aa nu khaan ihsin Rialti tiang leilung lamziin ihsin pi 18 kau, peng 5 sau katṭaya phahnak hrang ting 2035, zatekom ting 87200 (taan 8720), billion 8.72 man project an ap zo tiah theih a si.

India cozah in bomnak sumpai a pek ngaingai ih Falam hrangah 4 billion co ding a si ahcun atui` 8.72 billion sung ihsin ṭuan ngaingai leh dingmi hnaṭuan cu Chin ramkulh cozah in a relcat lai dingmi a si.

Chinland Herald DAILY News