INDIA RAM IH LOVE COMMANDOS (repost)

Hnam, milian le farah, biaknak thleidanaw zet nak India ram ih fala tlangval neiaw tamsawn cu duhdawtnak diktak siloin nu le pa pawl ih an duhsakmi nei fial ruang ih tthitaw an tamsawn. Hnam le sinak thlauaw ruangih neiaw theilo mino mah le mah thataw tla an tam zet. Hnam phunniam, farah le biaknak dang mi nei ruang ih mah nu le pa, sungkhat unau rori ih thahtuar (Honor Killng) khal siarcawklo in an um.

Hivek nu le pa duh thlunlo, mah nunnak thap rori ih mai duhdawtmi thawn neiaw pawl humhim ding ah Love Commandos timi NGO pakhat cu kum 2010, Delhi ah an din thok. Journalists, businessmen, lawyers le Human rights activists pawl komkhawmaw ih tuahmi a si ih an hnattuan bik cu nu le pa sungkhat unau pawl thu el in mah duhdawt taktak mi thawn neiaw pawl humhim in a leng mi zohman theilonak hmun ih hmun khuarsak a si ih an humhim mi nupa hnattuan nei in an mah ten an cawmaw thei tiang an enkol.

An din pekte ah cun Peace Commandos ti asinan Love Commandos tiah a hmin an thleng leh.India hmun dangdang ih um member 2000000 lenglo an nei ih nikhat ah bawmnak dil in phone call 400 luan an dong ttheu. Mi thupnak ding inn 450 luan an nei ih leitlun hmuntin in sumsaw bomnak an dong ringring.

Mi tam zet ih ngaihven zet mi NGO an si ih India film star Aamir Khan in a television show Satyamev Jayate ih love commandos co-founder Sanjay Sachdeva interview a neih hnu ihsin India ramsung, ramleng mi tam zet in an thei phah thluh.

UK based film maker Miriam Lyons ih zukmi an thuanthu na zohduh le The Love Commandos ti hmin in YouTube ah a um.