ISRAEL PANGPAR MAWI GAL GADOT

Tthal meikang bangin leilungpi huap in cak takih a karhzai mi wonder woman movie a zohtu cun a film cangtu Israel nunau mawi tak Gal Gadot hi a theilo kan um ka zumlo. Tulaitak ah Hollywood nunau lakih milar zet a si ih a thuanthu hrekkhat rak siar ve aw.

5 ft 10 in ih sang Gal Gadot hi April 30, 1985 Israel, Petah Tikva khua ah a suak.
A nu Irit (zirh tertu) le a pa Michael Gadot (engineer)hi Israel ram ih suak an si ih an fanu Gal Gadot khal cu an hnam daan le dun hnuai ah a tthanglian ve. Gal ti hi “wave” tinak san a si ih Gadot ti cu “riverbanks” tinak san a si. A ruang a sang ih tlawng a kai nak ah  Basketball leknak lam ah a hlawhtling zet.

Experience nei nakah ti`n a kum 18 a kim ah Miss Israel beauty pageant zuamawnak ah a tel ve ih rin lo pin a pakhatnak a ngah. 2004 sung thotho ah an ram aiawh in Miss Universe zuamawnak khalah a tel ve.

Kum 18 kim cun ralkap lut tengteng a ttul ti mi Israel daan vekin kum 20 a kim ah kum hnih sung Israel Defense Forces ah a lut. Israel Defense Forces instructor ttuan phah cingin model a ttuan phah ih kum 2007 kum ih suahmi mipa pawl hrang tuahmi MAXIM MAGAZINE hrang an zuk mi hin a hmel tthatzia le a riruang tthatzia a lang fing ih media pawl ih ngaihven a hlawh ttan.

2006 kum ah a pasal ding Yaron Versano thawn an tongaw ih 2008 ah an nei aw. 2011 le 2017 ah Fanu pahnih an nei.

An ram military service kumhinh sung a lut hnu ah Law lam fimthiamnak a zir sal ih Kumkhat a tteh fang ah Hollywood Director Justin Lin hnen ihsin James Bond “Quantum of Solace”film ah 007 fala si dingin sawmnak a dong. Nan, mirang tong thiam nan mihmai ih ttong pei nawn ih ttong nuam a ti lo ruangah le model, beauty queen, soldier, Law tlawngta asinak pawl lem cangtu (actress) hmin ih a khuh ttheh men ding mi a sianglo ruangah a el hai.

Talent a nei zia a theifiangtu Director Justin Lin cun ‘Fast & Furious 4’ ih tel dingin a sawm lala ruangah el thei nawnlo in a co hlang hai.

Movie sung ih sualaw nak, action tamsawn cu stunt performer pawl an hlang ttheu nan a nih cu Israel ralkap a ttuanlai ih experience a nei ruangah a mah ten a cangvai thluh thei ruangah lawm a hlawh zet ih ‘Fast & Furious 5 le 6’ tel ding in sawmnak cih.

Fast and Furious an zuk ttheh hnu in lemcannak khawvel ihsin cawl a tum nan ‘Wonder Woman’ film ih Superheroine si ding hin a mit a la tuk ruangah lemcang khawvel in a cawl sal lo.

Lemcang khawvel ih Nunau Superheroine film hlwahtlingbik Wonder Woman 2017 a cang hlan ah Batman v Superman: Dawn of Justice (2016) le film hrekkhat ah khal a lang hnuaihni.

Wonder Woman film cang dingin thla 6 sung Kung Fu, kickboxing, karate,Brazilian jujutsu le Rang to daan tiang in zirnak a nei ih interview an tuahnak ah Israel Army training kan nei lai hnakin Wonder Woman hrang ih training ka nei mi hi a har sawn ti`n a rak sim dah.

2014 ah Warner Bros. thawn film 3 cang dingih contract an nei ih film 1 ah $ 300000 lawng ngah ding an ti vekin Wonder Woman film a cang man Warner Bros hnen ihsin $ 300000 lawng a dong.

A netabik film a cang hi Justice League film ah a si ih Wonder Woman 2 khal a reihlan te ah cang an tum.

Gal Gadot hi lemcannak khawvel a lut hnu ah lawmman le sawmnak tamzet a dong ih cu pawl lak ih theihtlakbik cu United Nations in “Honorary Ambassador for the Empowerment of Women and Girls” hrang ih a sawmnak le “Academy of Motion Picture Arts and Sciences” ih member sinak an pek mi hi a si.

 

Film a telnak pawl

Fast & Furious (2009)
Date Night (2010)
Knight and Day (2010)
Fast Five (2011)
Fast &Furious 6 (2013)
Kicking Out Shoshana (2014)
Furious 7 (2015)
Triple 9 (2016)
Batman V Superman: Dawn of Justice (2016)
Criminal (2016)
Keeping Up with the Joneses (2016)
Wonder Woman (2017)
Justice League(2017)