ISRAEL RALKAP IN PALESTINE KUM 16 MI KAPTHAT LALA

US president Donald Trump in Jerusalem khua, Israel khawpi asi ti a phuang ni in Israel le Palestine karlak buainak a so sang sinsin ih Feb 29 ni Palestine pawl duhphawrhnak an nei nak ah Israel ralkap in meithal mu ngaingai hmang in Palestine nauhak pakhat a kap that thu Palestinian Ministry of Health in a phuang.

News ṭhenkhat ih phuang vek asile Israel lakmi ram West Bank district of Ramallah ah Palestine pawl duhphawrhnak an nei ih lungto, motor ke khangmi tivekpawl hmang in Israel ralkap pawl an deng ruang ih kap nak san si in an rel. Asinan hivek duhphawrhnak nei ih an hmanmi meithal mu hi rubber bullet asi tlangpi nan meithal mu ngaingai an hmang ruangah soisel an tuar zet.

An kap ngah mi Layth Abu Naim hi kum 16 mi asi ih al-Mughayyer khua ih um asi. An kap ngah veten sizung lam ah an tlanpi nan lamzin ah a thi.

Israel le Palestine karlak buainak hi a ni nii in a sosang vivo ih tu kumsung lawng ah Israel ralkap in Palestine mi 8 an kap that zo ih cumi sung ih mi 4 pawl cu kum 16 mi an si. Amnesty International Human Right pawl ih list tuah mi vek asile leitlun human right daan pahbal bik ram pawl lak ah Israel ram hi a pahnih nak asi.

warning===> Mithi ruak, thi le hnai zuk a tel