KABUL AH AMBULANCE HMANG IN THIHCIH BOOM AN PUAH

Afghan khawpi Kabul ah mina phurnak ambulance hmang in thihcih boom puahnak a suak ih minung 40 lenglo thi in mi 140 hrawng in hriamhma an tuar thu Health Ministry Waheed Majrooh in a sim.

Thihcih boom puahtu hi Taliban pawl an si ih Kabul khua ih hmun thupi Interior Ministry building le embassy hrekkhat umnakhmun bat ih puah hrim mi a si.

Hriamhma tuar mina an zawn lai
Hriamhma tuar mina an zawn lai

Kabul police thuneitu pakhat cun “misual pawl hman mi ambulance cu police checkpoint luhnak pakhat cu a luat thei nan checkpoint pahnihnak ih check an tum ah boom cu a puak ter” ti`n a sim.

Boom puaknak hmun cu thi le hnai hlir in a khat ih ṭap aw le hacang rial awn in mi a rap tiah boom puaknak hmun ih um mi pakhat cun a sim.Hriamhma tuar pawl cu sizung ah an tlanpi hngalh ih zamrang theitawk in cu an cangvai rero nan mithi an pung vivo ding Government official in zumnak a nei.

Tuikar sungah Kabul khawsung ih buainak a suak hi a voi 2 nak asi ih Kabul Intercontinental hotel Taliban pawl in luhhnawh in an kap ṭum khal ah foreigner 14 tel in minung 22 ih nunnak a liam.