KAWLRAM SUNG DAIHNAK A UM THEI DAANDING RELKHAWMNAK NEI

Kawlam sung daihnak a um theinakding ah biaknak phunkim hotu pawl thurelkhawmnak cu February 1 ni International Business Center (IBC), Yangon ah ropi zetin an tuah suak.

Korea ram ih Heavenly Culture, World Peace, Restoration of Light (HWPL) hohanak in tuahmi asi ih thil fate titlaklo te men asi ti ih kanruatmi hin a ralaidingmi tikcucaan ah ruahbanlo buainak tumpi ih a cang salthei zia simfiah awnak an nei.

Kawlram sung um biaknak phunkim ih upa pawl khal in kan kawram sung rualremnak, daihnak a um theinak ding ah biaknak, nunphung bangawlo mino pawl ih kan pawimawh zia le fimkhur takih kaihhruaiaw kan ṭuldaan zia minung 500 hrawng hmai ah simfiahnak an nei hnu ah an thurelnak tluang tak in an ṭheh suak.

Heavenly Culture, World Peace, Restoration of Light (HWPL) pawlkom hi leitlun daihnak a um theinak ding hrang cangvainak le relkhawmnak tuah in hmuntinkim ih vaktawi hnaṭuanmi pawlkom an si.