LAIVA LUAN AH KALA MISUAL PAHNIH IN MANG UK LAL PAISA AN LONG

March 4 zaanlam nazi 4 hrawngah bike thawn khual a tlawng mi mino pakhat cu Laiva luan ah misual pahnih in paisa an long sak tiah theih a si.

Salai Mang Uk Lal (kum 25 luan) cu zarhpi ni ah Falam ihsin Singai khua lam pan in a feh ih Laiva kiang, Hrianghnang buukte lan a tlen ah hmailem bun naamsau keng mi pahnih in an kham ih bike tawh an laak sak hnu ah paisa an dil ti a si.

Mang Uk Lal cu Malaysia ih hnaṭuan dah a si ruangah kala ṭong malte a thiam ih a khamtu mi pahnih thawn Malaysia kala ṭong thawn an biak aw thei ti a si. Misual pahnih cun, rawl leinak dingah paisa in pe aw an ti ih Mang Uk Lal cun paisa a neilo thu a sim nan zumlo in a thilri an check sak. A paisa bawm sung ih ks 10000/- a pai mi cu an laksak ih a mah cu tuahmawh loin an thlah sal.

Singai khua a thlen hnu, a thil ton mi an sut tik ah Mang Uk Lal cun khawbawi pakhat hnen ah a sim zo ih, khawbawi in a ṭul daan vekin a report ding a zum thu a sim.

Hih thuhla thawn pehpar in a thei ciangtu Saya Mang Hlei Sum cun,”Mang Uk Lal hi ka tupa a siih Malaysia ṭong rak thiam lo sehla ziangtin an tuah ding tihi ruahban lo a si. Curaungah mipi pawl khal cuih kiangkap ah ralring ten sukso cio ding in duhsaknak thawn thu ka run lo sim” tiah CH hnen ah a sim.

Hih Malaysia Kala ṭong hmang misual pahnih hi Muslim vaakvai an si ding tiah kiangkap khua pawl in an zum.

REF:::CH