MIRANG DO KHANLUNG PHUN A ṬUL MAW?

Hi thusuhnak kan san hlan ah Kawlram ah kawlpawl ih Chin pawl in hmuhdan malte vun tarlang ka duh.

1). Chin miphun hi mirang (American) missionary pawl ih Khrifa canter mi kan si ticu zapi theih asi. Cun Van Cung Lian ih thuanthu ngan mi tete ah kan missionary pawl le Chinram rak la tu British ralkap pawl then theih loih an hnawihnih awk caan tampi a um. Chin mi pawl rori hman in hmunkhat awin kan rak hmu hai. Cutikah an biaknak asimi Khrihfa sinak kan run lak bet tikah cun kawlpawl cun in mitkem nasa. Traitor or thitsaphuah biaknak or hmairang biaknak tin in kawhsak. Curuangah si U Nu prime minister asi lai ah Buddhism is national religion or Buddha biaknak cu kawlram miphun ih biaknak asi ti’n acozah rori in a rak nemhnget. Cutikah duh phorhnak Khrihfa pawl in kan rak nei ciamco nan hi thuhi tuni tiangah thleng asi hrih lo. A tawizawngin kan sim asile Kawlpawl mit ah biaknak lam zawngin traitor or titsaphuah kan si. Mai ram laksaktu’i biaknak neitu ti’n in hmu.

2). Kawlpawl, a tam sawn in, an pupa asimi an siang pahrang pawl ih ukmi ah inruat ringring. A hleice in tuilai santhar mino pawl in cu tin an ruat. Asinan Chin pawl cu mahte Lal thawn rak uk aw kan si ticu kan thei theh ko. Mirang in kawlram a rak neh tikah Chinram cu a dangtei do le neh a tul lai. Salai Van Cung Lian, kan mino historian, ih ngan mi ah el awk thaloin source tha zetzet thawn a ngan. Rak siar ve aw. Mirang kut ihsin independence kan hmuh hnuih Union of Burma ih tel fang kan si ti hi kawl thinlung le tluakah a um duh lo.

3). Kawlpawl hin mirang rak do tu an mai kawl pawl cu national hero ah an ret ih tlawngca khal ah an telh. Cozah in sunlawih upatnak khal a tuah ringring. Asinan kan nih kan Chin pupa mirang rak do tu pawl cu ziangah insiarsak duh lo. Sunlawih upatnak pek cu sim hlah thuanthu hman ah inretsak duh lo. An mino pawl tla cun mi aa zet ah inruat hai bet lai.

Curuangah hi Sim unau pawl ih khanlung phun mi in thu pathum a sim:

1). KAWLRAM CHRISTIANITY CU TITSA PHUAH OR TRAITOR BIAKNAK ASI LO.

2). CHINRAM HI KAWL UK MI KAN RAK SI DAH LO. PINLUNG HI KAWLRAM KAN SI THOKNAK ASI.

3). CHINMI HIN HERO TAMPI KAN NEI VE.

Curuangah hi khanlung vek tampi CHINRAM SAK TLANG ah um lam sehla tin sa duh ka that. Culawng hman siloin kawlram huap in kan hero pawl co hlan an si theinak dingah naingnganzi tama pawl in in nawr piin kan tlawngca history rori ah telh thei sehla ti’n sa duh ka that. Cun kawlca cauk tampi suah vivo thei sehla.

Kan pupa pawl in “mi lian zar to, sa kap zar to” an rak ti. Chin miphun in Sim thuanthu zar kan to tin ka ruat. Sim pawl uar aw deuh an um khal le an lungawi kan lungawi tin ruahsak awk thiam sehla kan dam bik ding. Ka lungawi.

Laknak ::: Mang Hup Luai timeline
Zuk ::: Tluang Sum Tupa