MIRANG TI`N KAN KO MI BRITISH PAWL IH CII THLAHTU, MIDUM LAMPANG AN RAK SI ZIAR

Kum 10,000 reizo mi minung ruh DNA test nak an nei mi in British scientist pawl cun an cii thlah tu an pupa pawl hi sam kir deuh, taksa vuun dum nei an si ti an hmusuak.

The “Cheddar Man” tiih an ko mi DNA an test nak minung ruh hi 1903 Somerset, south-west England, Cheddar khuate ih an hmu mi a si ih British ram ih minung ruh an hmumi hmuahhmuah lakah a tar bik khal a si. Ice age hnu ih British ram lut hmaisabik a si ding an zum ih a luruh DNA thawn a mah ding awmang an tuah sal.

Natural History Museum le University College London scientist hoha nak in tulai technology hmang ih a mah vek an tuah sal mi cun taksa vuun dum lampang nei in a mit a pol ih a sam a kir deuh.

Hih research nak an nei mi hi TV documentary hrang ah a si ih an zirsuak mi pakhat cu taksa vuun raang kan si ruang ah kan pupa pawl an taksa a raang tinak a silo ih vuun dum, vuun sen khal an si thei tihi an hmusuak mi pakhat a si.

Research an tuah nak video hi “The First Brit: Secrets of the 10,000 Year Old Man” ti`n hmin an pek ih February 18 ni TV (Channel 4) ah thlah an tum.