MIZO 50 IN ṬIO AH MEITHAL THAWN PALIK AN SIIM

Mizoram, Melbuk khua ih mino pawl an si ding zum um mi mipum 50 lenglo cun Haimual kiangih Tio tiva kap ah an mawṭaw kaih tuar 21 pawl lak saal dingah meithal thawn palik pawl an va siim ih an mawṭaw zaten an laak thluh saal tiah theih a si.

February 6, zaanlam nazi 1 hrawngah mawṭaw kaihmi 21 kiltu palik 6 pawl hnen ah mipum 50 lenglo cu meithal, thingtan le naamte pawl thawn an ra ih mawṭaw tawh pawl an laak saal hnu ah Mizoram Melbuk khua ah an tlaan saal ti a si.Hih mawṭaw pawl hi November 30, 2017 lai ah Falam DC U Moe Zaw Soe hohanak in daan lo ih dat-mi-aw-za (dawm) phurmi pawl an rak kaih dahmi a si. Mizoram Melbuk ihsin Ṭio tiva an tan ih Haimual khua ah dat dawm pawl hmawng-khu ih an phur lai an kaingah mi a si ih a mawngtu le a thluntu pawl cu khalai ah an tlaan thluh ruangah an kaai ngah lomi a si. An kai mi mawṭaw pawl cu Ṭio tiva kap ah atu tiang an ret ih cumi mawṭaw pawl rung lak salding ih siim an si.

Mawṭaw kiltu palik 6 pawl cun a siim tu mipum an tamtuk ruangah an cangvai ngamlo ih Mizo pawl cun hridai thawn an ṭeem, an phone pawl an long thluh hnu ah mawṭaw tawh laak in Melbuk lam ah an kiir sal ih Ṭio ralkhat lam an thlen in an thilri laksak mi pawl cu an tanta ṭheh sal.

Rihkhawdar ih vuanthokbawi ṭuan tu U Myo Myint Aung cun, “Lai meithal zuun 4, 5 lai an keng ti`n kan thei. Atu ahcun anmah lam palik le ralkap thawn sualtuah mipum 50 pawl cu phawrhsuak dingah ram hnih ṭuanvo neitu pawl in an tawlrel rero laifang a si” tiah a sim.

Ṭio ih thu a leeng daan ahcun Lai meithal lawng si loin, meithal dang pawl khal an keng ti a siih ramri luan in hibangtuk an tuahmi parah tualsungmi pawl an lungkim lozet tiah theih a si. Ṭio khuami pakhat cun, “kan palik pawl meithal hnak ih ṭhasawn mi meithal an kai thei tikah mihmai a nau duh zet. A rengreng ah ṭuanvo neitu pawl khal in mawṭaw an kaihmi pawl cu tiva kap ah ret men loin khuasung ah phur lut thluh sehla hivek tla a cang lo ding nan” tiin a hmuhdaan CH ah a sim. Cuih hmun ih mawṭaw kiltu palik pawl cu ṭuanvo tlamtlinglo tiin thawng thlak an siih ṭa-wan-khaan cu palik senthum Pu Zung Khup a si tiah CH in thuthang a ngan.

REF:::CH DAILY NEWS