NAMTE 100,000 THAWN TUAH MI, MILEM (KNIFE ANGEL)

A ni nii ih a karhzai vivo mi namte hmang ih rob aw, thatawnak a mal vivo theinak dingah Save a life, surrender your knife timi thulu bun in British Ironwork Centre cun London Trafalgar Square ah namte 100,000 thawn tuahmi 27 foot sang milem Knife Angel an tuah.

A milem hi police forces 41 lenglo in misualpawl hnenih lawngmi, misual gang ih rak lut dah pawl ta le namte dawt ruangih thi zo sungkuapawl ih ret tthatmi namte pawl hmangih tuahmi a si.
Namte hrekkhat cu thisen tlap um teptep lai tla an um ih milem a thla tuahnak ih an hmanmi hrekkhat cu namte ruangih a thitu hmin ngantelmi namte an hmang.

England khuasung, namte hmang thilsual tuah tamsawn cu tlairawl kum 16 kiangkap hrawng an si ih sunlai padir mitamzet um lai khal ah mi bike le paisa long tivek an hmang.
UK ramsung knife crime an record mivek asile kum dang ai in tui kum sungah namte hmangih thilsual tuah hi 28% in an pung.

British Ironwork Centre cun Knife Angel kantuahsan bik cu kan cozah pi le kan educational system in namte hmangih thilsual tuah ziangah an tam vivo tihi theithiam in an mit a vang theinakding duhsan ih kan tuahmi a si ti`n an website ah an tar lang.