Pathian mihman ka si tiawtu kumkimlo pawngsual hmang Kumkhua Thawngtlak dingin thu ṭhen sak

Pathian mihman ka si tiawtu (self styled godman) Asaram Bapu (kum 77) cu 2013 ih kum 16 fala pawngsual thuthawn pehpar in kumkhua thawngtlak dingin thu an ṭhen sak.

India ramsung lawng siloin ramleng khalah dungthluntu thawngteel neitu a siih himi pawngsual thu ah a dungthluntu 4 thawn 2013 ah thawng an thlak ih kum 4 reihnu ah tuvekin thu an ṭhen sakmi a si. Himi case lo khalah human trafficking, le nauhak kumkimlo pawngsual puh khal a tuar hnuaihni.

Pawngsual tuartu sungkua simmi ahcun an fanu sungah khawsia a lut ruangah dawisuak dingin Jodhpur, Rajasthan ah an hruai. Cuhnu ah Asaram Bapu cun a pawngsual ih caan reinawn an umnak hmun ah a khum bet ti a si. Cumi thu an theisuak hnuin an kaai ih September 1, 2013 ah thawng an thlak.

Thawng a tlak thok ihsin tuni tiang bail nakding ca voi 12 rori an thehlut nan Thuṭhennak zung in a reject. Thawng a tlak sung khalah cozah hnen ah thil phunphun (rawl, TV, Ihkhun special tvp) a dil ih suak thei daanding phuahlam phunphun hawlin a cangvai. Taksa damlonak puhmawh khalin a suak tumnan Checkup an nei tikah a dam in thi.

Thawnginn lenglam khalah a dungthlun pawlin buainak phunphun an rak tuah ih thawng a tlaknak thuthawn pehpar awmi minung 3 khalin that an tuar phah. Pawngsualtuar sungkua pawl khal nasa takin hringhro an tuar ih palik pawl tiangin an kil lawk. Tuvek ih kumkhua thawngtlak dingin thu an ṭhen sakmi par ah pawngsualtuar sungkua le mipi an di riam zet.

 

ref:::DNA