PHILIPPINE RAM IH MEISATLANG A PUAK CING DING AN ZUM (+video)

Philippine ram ih tlangsangbik Mayon meisatlang cu ni reilo te ah a puak thei thu thuneitu pawl in an phuang.

A sang lam 2,462m (8,077ft) asimi Mayon meisatlang hi January 13 hrawngin a cangvai thok zo. Meisatlang kiang um khuasung mipi 40,000 lenglo khal an umnak hmun ihsin ṭhawnter ansizo ih Philippine Institute of Volcanology and Seismology in ṭihnung level 4 ah a ret. (ṭihnung level 5 = thil ṭihnung cang rero lai)

Meisatlang ihsin 8 km (5 miles) hlat hmun pawl cu ṭih a nungtuk ruangah zohman feh an sianglo. Khaw hrekkhat ih tlawng pawl an khar ter ih a leng an suak khalle hmaikhuh bun dingin an fial. Hmun ṭhenkhat ahcun meisatlang ih a suakmi vutcaam ruang ah nitleu khal a lang theilo.