Ralringaw::: Racheal George timi account hmang tu hi MI BUM HMANG a si

Kandung zarh sungah Racheal George timi hnim hmangin kum upa lam deuh nunau pakhat in Facebook friend request nak in rak kuat. A friend list ka zoh hmaisa ta ih ka mitheih ramdang rualpi tete pawl a friend list ih an um ve ruangah in request nak cu ka co hlang.

Ni hnih thum hrawng reihnu ah Racheal George cun, “rualpi ah in pom ih ka lungawi. Kei mah hi Indonesia ram mi ka siih ka pasal cu Myanmar ram mi a si. UK ram ah kan um ih August 16, 2014 ah ka pasal in, in thih san. Culaiah, kei khal cu ka cancer natnak a luar sinsin ih ka doctor in dam theiciin a si nawnlo, thla reilo te lawng na dam ding in ti.

Ka pasal hi UK cozah thawn hnaṭuan tlang in 4.7 million dollars contract nei a si nan a thizo ruangah cuih paisa pawl cu a hloral ṭheh. Kan pa thawn kan neiawnak a reizo nan fate kan nei theilo. A mah hi mi harsa bawm ringringtu a si vekin a thih hlan ah miharsa, nu le pa neilo tivekpawl bawmtu si dingin thu i cah ta ruangah kan khua Indonesia ah million 2 ka kuat zo ih ka cancer natnak enkolaw nakah $ 700,000 hrawng ka hmang suak zo.

Tu ka damlonak ruangah thla reilo te lawng dam ding ka si vekin ka paisa neimi pawl hi mi harsa, nu le pa neilo, nuhmei pawl bawmnak dingah hlu ka duh ih cuih ka tumtah mi cu nang mah kut ah lo hlan in paisa million 2 ka lo kuat ding. Himi ka lo kuat ding mi paisa hi hnam, biaknak le sakhua thleidaannak um lo in na rak hmang dingin zangfah ka lo dil” tiin ca in kuat ih a thuailam ih zuk khal in kuat cih.

Kei khal cun a tumtahmi thei cing in, “Ziangtin ka lo bawm thei ding” tiin ca ka kuat kir leh sal.

Amah cun, “ka dinhmun in theithiam ih ka lungawi. Hi paisa ka lo kuat hnu, rei ka dam nawnlo dingih mi na bawm mi pawl khal cu ka hmu man nawn lo ding nan thilṭha na tuah tengteng ding tiah Pathian hmin hmang in ka sim ngam. Cule himi paisa ka lo kuat mi sung ihsin 30% cu nang mah in na co ding. Curuangah paisa ka ret nak bank ah lo kuat nak ding Address pek a ṭul.

Na hmin ngai, na ID, email, phone number, na address le tufang ih hna na ṭuan mi tvp in rak kuataw la ka bank manager hnen ah ka rak pek ding ih cuhnu in paisa an lo kuat ding. Himi paisa ka lo kuat dingmi thu hi paisa na dong hlanlo zohman theiter hlah aw. Culole midang in an rak beisei ve pang ding.

Ka um nak address cu No. 42, Chester House 1-3, Brixton Road, London SW9 6DE a si. Ka simbet sal ding na hmin ngai, address, phone number le ID zuk kuat hmaisa ding kha mang ringring aw” tiin i let sal ih a tanglam ih zuk i rak kuat sal.

Himi hi bumawknak a si timi thei cingin a um nak address cu google map hmangin ka hawl ih Business Center pakhat a rak si ziar.


Address ka hawl ih ka hmuh suak mi cu ka zuk ih “nang mah vek minung an rak piang hicu leilungpi a vansia tuk” timi ca thawn ka kuat tel cih.

TL pa