SOUTH AFRICA, CAPE TOWN KHUA INDING TIDAI A CEM CUAHCO

Kum khat ah million 2 kimzik tourists lutsuak ringring nak South Africa, Cape Town cu kum 3 sung ruah a dongmaltuk ruangah tidai harsa in buainak an tong rero thlang.

Tuvek zin ih ruah a sur thei cuanglo cun April thla hrawng tiang lawng an mipi pawl tidai an pe thei ding. Tu khal ah tidai duhduh ih hman an sianglo ih mi pakhat in nikhat ah gallons 23 lawng hmang dingin thu an suah. An cozah in tidai bualaw khal supdeuh dingin a dil hai ih motor kholh, inn hmai titawih khal an sianglo. Ek inn ti khal a ttultukcaan lawngah tidai tampi tawih dingin zangfah an dil.

cape town
cape town

An tidai a cemding ni hi “Day Zero” ti`n hmin an pek ih, hi ni a thlen cun an mipi tidai an supply mi an cawl ding. A tangmi sun tidai cu sizung, thawng-inn tivek lawng ah limit nei in an pek ding. Tidai harsa rungih an ramsung buainak a umlo nakding in innsang khat ah nikhat hmanding tidai gallons 6 lawng pek a si ding. Gallons 6 tidai an pek dingmi khal bawh cawp in mahte khai a ttul ih buainak a suak pang ah tiin palik pawl in meithal thawn an kil ttheptthep ding.

Cape Town hi minung million 3 hnak ih tam umnak a si ih tuvek zin ih leilungpi a hlum vivo ah cun an ram in ruahpi a donglo sinsin ding.