THUSUTDING HLIR IH KHAT VANCOUVER FALA ELISA LAM THIHNAK (+video)

Downtown Los Angeles ::: Cecil Hotel mikhual pawl in an tidai in mi rim nei, thaw lo in adum ruangah hotel hnattuantu pawl hnen ah an sim thei. Hotel thuneitu pawl in inn tluntabik ih an ret mi an tidai tank an zoh tik ah February 1, 2013 ihsin ahlo mi University of British Columbia ih tlawngkai lai Canada,Vancouver fala kum 21 Elisa Lam, taklawng ih um aruang cu (ahnipuan hruh mi tidai par ah aphuan aw) an hung hmu suak. Cumi hnu in a thuhla um dan an theisuak vivo ih media pawl ngaihsak hlawh in leitlun ih mingaihven zet mi case pakhat ah a hung cang.

Elisa Lam hi ahlo ve ten HongKong ihsin Canada ih vaai anu le pa in L.A police pawl hnen ah an report nan police pawl cun an hawl hmu thei lo.Tingaihnak theilo in February 1 Cecil Hotel elevator camera ih zukngahmi Elisa Lam ani netabik video cu February 14 ah LA police in internet ah an thlah.

A video sung ah cun Elisa Lam cu dawitu nei ih tihzet vekin elevator sung ah alut ih hmet ding aum mi hmuahhmuah ahmet nan sangka akhar aw thei lo. Sangka leng ah ahngawng dak in keh le vorh azoh ih akawm te ah ava ding sal. Tawkfang aum hnu ah a leng ava suak sal ih mi in akut ngel ih kai tu nei vek, danglam zet in acangvai ciamco. Cun atlan hnu tawkfang ah elevator sangka cu amah ten akharaw sal. Hi mi hnu in Elisa Lam cu ahlo lan ta.

Ahloh nak zarhhnih luan hnu aruak autopsy an neih mi result ah cun Elisa lam hin rittheih si le vai tham mi anei lo. Tidai sung ih tlak pang ruang ih thi ti`n Official in an phuang nan mi tam zet cun athihdan an phung mi hi an zum thei lo.An hotel tlun ta bik ih sang ka hi alarm system bun asi hlei ah pi 10 ih sang an tidai tank hi mah ten Ong ih sin sal thei ci asi lo ruang ah Accident ih thi si lo in thil pa khatkhat cang cu aum ko ti zumnak an nei.

HOTEL CECIL TIKHAWLNAK TANK
HOTEL CECIL TIKHAWLNAK TANK

Elisa Lam hin athih hlan a blogspot ih ca angan mi ah ka dam lo nak ruang ah si ei mi ka nei lai, ka nat asuak caan ah hin ka bei adong ttheu nan mah le mah thataw ding khawp cun ka ral attha lo ti`n arak post dah.

THUANTHU MAWILO CECIL HOTEL
1. 1920 ih sak mi a si ih man ol ten rei pi um thei nak riahbuuk a si ruang ah mi phunkim in an pan ih mah le mah thataw tla an tam.
2. Pauline Otton kum 27 mi tla cu innchawng thuah 9 nak in adawp ih zinpi ih rak vak lai George Gianinni (kum 65) par ah avung tlak ngah pang ih an pahnih in an thi.
3. “The Nightstalker” ti ih an ko mi Serial Killers Ramirez in 1985 lai ih Cecil Hotel atlun ta bik aluah ttum ah hotel ih um ve nunau 11 arak that dah.
4. 1991 khal ah Austrian Magazine hrang ih hnattuan journalist Jack Unterweger in hlawhhlang nunau pathum arak that dah ih an hotel pi hi ahuai ti tu tla an um.
5. 1947 kum rapthlak zet ih that tuar “Black Dahlia” ti ih mi theih tam Elizabeth Short khal athih hlan te ah Cecil hotel ah a rak um. (Black Dahlia ti hi Film in tla an suah)

CECIL HOTEL
CECIL HOTEL

THIL DANGLAM
Elisa Lam thihdan hi 2005 horror movie an suah mi “Dark Water” thawn athuanthu abang aw zet ih a film sung ih cangtu bik nauhak nu te hmin ah Cecilia (Elisa Lam thihnak Hotel hmin), anu hmin ah Dahlia (Black Dahlia) ti asi.
Elisa Lam aruak an hmuh hnu rei lo te ah Cecil Hotel kiangkap ah damlonak phunkhat athleng ih an test nak kit hmin ah Lam-Elisa ti`n an ko. Mihrek cun Elisa a ruak thlii tidaisung ih a luang ruangah a in ngahtu pawl nat an ngah nak asi ti zumnak an nei.

A CANG THEI MAW?
1. Cecil hotel hi illuminati pawl thawn pehzom aw nak nei in an zum ih Elisa Lam hi Raaithawi nak ah an hmang teh si pei maw?
2. Thil ahmuh lo ding mi hmu pang ruang ih Hotel hnattuan tu pawl ih cangvaihnak teh asi pei maw?
3. Canada company pakhat in technology thar an hmusuak ih hlothiam ralkap an tuah thei timi a blog ih arak post dah mi ruang ah teh si pei maw? ti`h thusuh ding hlir in akhat mi kum 5 rei zo Elisa Lam case hi tu ni tiang angaihven tu an tam zet lai.