TUNI TIANG MI THINLUNG A KHAWIH ZET MI “OMAYRA SANCHEZ” ZUK

November 13, 1985 Colombia ah meisatlang (Nevado del Ruiz Volcano) a puak kuai ih a suak mi meisa ti, vur le cairbek pawl cun tlang kiangkap ih a um mi khua tamzet a siatsuah. Cu pawl lak ah kum 13 mi Omayra Sanchez um nak khua Amero khal cu a siat tel ve. Omayra Sanchez cu an inn a siat mi lak ih tang a ni a bawm tum lai ah rinlopin an inn phar a tluk ih a ke a nen tang.

Nauhak lai a si vek in tha a nei lo ih concrete thawn tuah mi an phar ih a ke tang mi cu a dir suak lohli theilo.A rei deuh hnu ah cun a a rit deuhdeuh ih dir thei ngeih nak a um nawn lo. A hmutu pawl khal in bawm an tum nan a ke nen nak concrete a rit tuk ruang ah le bawm nak ding hriamhrei thilri an khua ih a um lo ruang ah zohman in an run theilo.

Cutin harsa tak in zaan thum sung a um hnu ah celh nawnlo in a nunnak a liam. Zuk sung ta hi a thih hlan te ah photojournalist Frank Fournier in a zuk ta mi a si ih, hi Omayra Sanchez zuk hin 1986 World Press Photo of the Year award a dong.

Nevado del Ruiz Volcano hin minung 23000 hrawng ih nunnak a lak ih khua 13 hrawng a siatsuah. Colombia ram thuanthu ih siatralnak an tongmi lak ih nasabik a si.