TV Sung ih An Cangvaidan Cawng ruangah Kum 8 nute Awkaw That Ngah Pang

India::: Uttar Pradesh, Hapur khua ih um Simran (kum 8) cu crime TV show (Savdhan India) a zoh lai ah TV sungih an awkaw danvek cawng in a cangsual ih a hngawng in a thlai awthat ngah pang.

A thih nak hmun ah zingzoi dingih fehtu Palik Hemant Kutiyal cun, “Simran cu TV zoh dingin an inn kiang ah a feh ih a mah hrihruai nauhak pawl thawn TV an zoh tlang. Nuam men ah tiin bucket par ah a kai ih fan par ih an sih mi naute awi nak hridai cu a hngang ah ṭawnaw in TV sung ta an um daan cu a cawng.

Fan ih sih mi hridai a si tikah fan cu a hninaw ih a pal nak bucket cu a pelh. A hngawng in a thlai aw ih a auawn cu a rualpi pawl in an tih ih inn leng ah an tlan hlo thluh. Tawkfang in an va zohsal tikah Simran cu a rak thi zo. An sungkhat pawl ih kawk ding an phang ruangah Simran ruak cu an ṭhum ih mi um lo nak an inn room khatlam ah an thup. A sung le pawl cun an fanu a thi mi cu zaan lawng ah an thei ih Palik zung ah in rak phone hngalh” tiin Palik pa cun a sim.

An report pek ahcun upa pa khatkhat ih that mi a si ko ding tiin palik pawl cun an zum lawk nan, a thlaiaw lai ih um nauhak pawl in a tuahdan vekciah cawng in an sim hnu lawng ah cangsual ih thilcang mi a si tiin an pom sal. A ruak cu Post-mortem an tuah hnu ah a sungkua pawl hnen ah an kuat sal.

Kan dungkum khal ah hivek in TV sungta cawng ruangah Lucknow ih um kum 14 pate a rak thi dah.

Hram:::Hindustan Times