US mipi rak ti thinphangter ṭhehtu Annabelle milem huai (Part 1)

Horror film zoh ṭheu pawl cun milem huai Annabelle thuhla kan thei cio ding ka zum ih film ih an zuk saal mi hnak in a thuanthu ngaingai a rak raapthlak sawn. 2013 horror film an zuk mi The Conjuring ah malte a rak langdah ih 2014 ah Annabelle tiin hih milem huai background ah hmang in film khal an rak zuk dah ih 2017 khalah Annabelle: Creation tiin an rak suah dah.

Film sungih an hmanmi Annabelle
Film sungih an hmanmi Annabelle

Hih milem a huai thokdan cu 1970 ah nurse zir rero lai Donna timi in a fanu birthday laksawng pek dingin naute lem pakhat a lei. Amah cu a rualpi Angie timi thawn inn hlang in um tlang mi an si.

Cumi (Annabelle) a leihnu ni reilo te ihsin naute lem cu an theilo sungah a mahten hmun dangdang ah a ṭhawnaw thok. Ihkhun, tohkham par tivek ihsin zial ah a ṭhawnaw ṭheu ih a mahten a tlak menmi ah an ruat ṭheu. Nan, neta lam cun Donna in a ihkhun ih a retmi cu Angie umnak room ihkhun par, sangka kiang, milengkhaan tivek ah a ṭhawnaw ṭan ih an mah tiangin a sual ṭan.

Milem huai Annabelle
Milem huai Annabelle

Lou tiih an ko mi mipa rualpiṭha pakhat an neiih Donna te inn ih a lengṭan ni ihsin naute lem a hmu veten a ṭih cia. Cuih naute lem khal cun an rualpa cu a remlo cuangih khualeng an suaksung tivek ah nauhak cangan thiam pekte kutngan vekin “Help Lou” “Help Us” tivek caphek par ah ngan in innsung le sangka tivekah arak tar ṭheu. Acaan le a taksa sungih thisen suak vekin a kut khal ah thisen a rak um ṭheu.

Cutiih a hrang vivo ruangah venghnen pawl an sim ih an venghnen pawl cun nan umnak inn an sak hlah ah Annabelle Higgins (kum 7) timi nauhak thicia ruak an rak sardah ih cumi thlarau siding tiin an sim ih an zangfah tuk ruangah a huai ti theicing in naute lem cu ankol thotho.

Lorraine Warren le Annabelle
Lorraine Warren le Annabelle

Annabelle Higgins thuhla an thei zaan ihsin an inn ih riak pohpoh cun mangsia rapthlak tak an hmu ringring thok.

Voikhat cu an rualpa Lou in a riak hai ih zaan lai ah a ṭhang thutthi. Hridai thawn ṭawnmi bangin taksa cang theilo in a um. A mit lawng a cang theiih ihkhun tawlam a zoh tikah naute lem cu a rak ding ziarziar. Au a tum nan a aw khal a suak theilo. Naute lem cun a taksa zuut hruanhro phah in a ṭang ah a to ih a hngawng a rek. A rek natuk ruangah thawsam, lungmit, zianghman thei nawnlo in a um ih zinglam ni suakhnu lawngah a ṭhang leh sal. A mang ah a ruat lawk ruangah Donna le Angie cu zianghman a theihter hai lo.

Zaanlam hrawng ih hramlakvak an tum ruangah Lou cun tiim a tuah rero ih Donna room lam ihsin awnai a thei. Donna le innleng a suak laifang a siih misual siding zum in Lou cun a va bih. Minung zohman an rak um lo nan milem Annabelle cu an retnak ihkhun par ah um loin tohkham ah a rak hninaw rero. Lou cun a va pan tum ih cufang ciah ah a dunglam ih miding um vekin a thei. Thinphang in a cang ngamlo ih a ding rero lai cu a awm ah tin hriamzet ih kheuh mi vekin a thei. A vun zoh tikah siirlam zawngin 3, pheilam zawngin 4 kheuhnakneh a rak um. Cuih hmaneh cu midang khalin an hmuthei nan nihnih hnu ah mangbangthlak takin a hlo lehsal. Cuhnu cun Annabelle a si ciang rori timi zumnak an nei ruangah naute lem sungih um an zummi thlarau sia cu dawisuah dingin an ngaihven ṭan.

a saudeuh ruangah (part 2) a hran in ka run pehsaal ding..