KUM 3 REIHNU LAWNGAH AN NAUTE AN THLENGAW TI AN THEISUAK

2015 March thla, Mangaldoi civil howpital, Assam ah Salma Rarbin le Sahabuddin Ahmed cun naute an nei. An fate cu a nu in ciangten a hmu tikah na fa asilo ti`h simtu a thinlung sungah a um vek in a thei. An pa hnenah a sim nan an pa cun a zum vak lo. Nan, thla 3 sung rori an nu in an fa ngaingai a si lo ding ti a zum thu a sim ringring tik ah um theilo in zingzoi a tum.

Naute an nei nak sizung ah a hmasabik ah a va sut nan, sizung thuneitu pawl cun nan nu thluak lam damlonak a nei si ding, psychiatrist pawl hnen ah zamrangten na fehpi a ttul tin an rak ti men.

Beidonglo in naute an nei ni tikcu le caan ih naute neivetu pawl list zoh dingin zangfah a dil hai ih list sung ah cun Sewali Boro timi hmin Boro miphun nunau pakhat in nau a neive ti a hmusuak.

Naute pa Ahmed cu Sewali Boro um nak khua ah feh in zingzoinak a va nei. Voihnih a feh cu zianghman cangvai ngamlo in a tlungsal ih a voithumnak a feh cu “Kan nu in nan naute le kan fa kan nei ni ah kan thlengaw ngah pang ti zumnak a nei. Nan zumve pang asile in contact uh” ti`n ngamlo cingten ca a taan ta.

Ni 10 rei hnu ah Boro sungkua cun an inn ih tongaw an duh thu let nak ca an dong. Tongawnak an nei ni ah Ahmed cun mit kau zet an naute a hmuh veten an fa a si ding ti zumnak a neimi a hnget sinsin. (Boro miphun hi vai pawl vek siloin a tlangpin an mit a bi). An innsang pahnih lungkimnak in an naute cu DNA test nak an nei ih an suak pek ah an rak thlengaw ngaingai ti cu November 2017 a result suakmi ah an hmu suak.

Hi thuhla hi Assam Court in rorelnak a neisak nan an sungkua pahnih lam ihsin kum 3 sung rori mah fate vek ih kan zoh enkol mi naute cu kan fa a si mei tiin ruahnak an nei ih thlengawsal an duhlo ruangah thlengawlo lanta dingin thu an rel cat sak. (Hivek thumaksak hi ziangruangah hi Sizung ah a cang ti cu zingzoinak an nei rero lai.)