THUKHAM 10 THINGKUANG (Ark of the Covenant) UM NAK ETHIOPIA ???

Aliamzo kum 3000, Israel miphun nelrawn ih an vak lai, Moses in Sinai tlangpar ih a lak mi Thukham 10 le a thingkuang hi Christian santhuanthu ih thil thupi pakhat ah a tel ve. Hi thingkuang umnakding awmang hi kan mah Christian pawl lawng siloin zumlotu tamzet khalin buaipi in an thinlung a lak zet ve.

Mi tam zet cun 586 BC hrawng, Babylon pawl in Jerusalem temple an siatsuah ttum ah ahlo lanta ti`n an zum nan Ethiopia pawl cun Siangpahrang Solomon le Queen of Sheba (Makeda) fapa Menelik 1 san lai ihsin tuni tiang an ram ih um in an rel ve.

Ethiopia ram a thlen dan

Ethiopia thuanthu sung um vek asile fimthiamnak lam ngaisang milian hmelttha mi-dum Queen of Sheba hin Siangpahrang Solomon ih lenn zia, fim zia thu a theih tikah rimhmui phunphun, sui, ngun le lungmankhung phunphun laksawng keng in Solomon ih fimnak hniksak dingin Jerusalem lam a pan. Jerusalem athlen hnu Solomon thawn an tongaw tikah a thusut duh mi hmuhhmuh cu a sut ttheh. Harsazet ih aruahmi a thusut mi hmuhhmuh cu solomon in olsamzet ih a saan thei ruang ah le Solomon ih lennak pawl amai mit rorin a hmu tikah mangbang zetin alungci a mit thluh.Cuticun a ngaisang emem mi Siangpahrang Solomon cu laksawng tam zet ape hnu ah it tlang in Solomon ih fa a pai.

Queen of Sheba cu lunghmui emem in a ram ah atlungsal ih Ibn al-Hakim, “son of the wise man” ti’h hmin apek mi Solomon ih cithlah fapa te cu a run nei suak. Ibn al-Hakim cu a hung tthanglian vivo ih Menelik 1 ti ah hmin thleng in kum 20 aluan hnu ah a pa Solomon tongding in Jerusalem ah a feh.

Cutin a pa hnen um phah in kum 3 sung Moses daan (Law of Moses) a zir nan Jerusalem um Israel miphun pawlin Solomon hnen ah na fapa Menelik thawn nan aw, hmel, riruang le nan mawi dan pawl a bangawtuk ih zosawn kan Siangpahrang nan si ti kan theithiamlo, curuangah Menelik hi an ram ah tlunter salaw tiah an dil.

Solomon cun thu tthaten a ruat hnu ah, ka fapa an ram ih tlunter sal nan duh a si len Jerusalem ih um puithiam sang pakhat fingfing in nan fapa upabik le Israel hnamtinkim lakih hnamkhat fingfing in minung 1000 ciar nan thlunter le lawng ka tlunter ding ti`n a let hai. Cutin Israel mipi khal cun Solomon ih a sim mi lungkim in Menelik cu an ram ih kuat sal an tum.

Menelik an ram ih a tlun hlanah athluntu ding ih tel ve Jerusalem puithiam sang Zadok fapa Azariah ih mang ah Thukham 10 retnak Thingkuang lak thup dingin laarawknak a hmu. Azariah cun laarawknak a hmuh mi cu Menelik hnen a sim tikah Menelik cu a thin a heng zet nan Zadok fapa Azariah cun PaThian in na ram ih tlunpiding a duh sawn mi si ti`n a sim ih a lem thei sal.

Menelik in Thukham kuang a ram ih tlun ding a lungkim veten Thukham kuang lem pakhat an tuah ih a ngai thawn athupten an thleng. Cui thu cu Solomon in atheih tikah a thin a heng ngaingai ih a fapa le a thluntu zaten that ttheh ding in a dawi nan a mang ah dawilo dingin laarawknak a hmuh ruangah a tthulh sal ih an puithiam sang pawl hnen ah zohman theihterlo dingin thu a suah. Hi ni ih thawkin Thukham 10 Thingkuang (Ark of the Covenant) hi tu ni tiang Ethiopia ram ih umlanta in an rel.

THUKHAM 10 ANRET NAK “CHURCH OF OUR LADY MARY OF ZION

(Ethiopia ram pawl ih reldan)

Thukham 10 Thingkuang (Ark of the Covenant) hi Ethiopia, Axum, the Church of Our Lady Mary of Zion biak-inn ah a um ih kohran-daan hngetkhoh tak hnuaiah kilkhawi in a um.

A kiltu ding ih an ret mi puithiam sang mi pakhat siarlo zohman ih zoh sian a si lo. A kiltu puithiam hi Virgin a si tengteng ttul ih a dam sung Thukham kuang kil ding in a nunnak a pe aw ttul ih a san sung a leng ah kekar khat khal suah a theih lo.

A kiltu hmuahhmuah hi Thukham kuang ih power le a tleunak ruang ah mit siat in dam rei an um lo. A thih hlanah a mah in Thukham kuang kilkhawitu ding mithar a hril ta tengteng a ttul.

Hi Thukham 10 Thingkuang le a kilkhawitu thuhla hi research tuah in History channel pawl in Documentry film 2008 ah an rak suah dah. Nation Geographic pawl khal in thukham kuang Ethiopia ramsung an luhpi ih an feh an ti nak lamzin zawh in research an tuah ih kha lai ih an hman mi raithawi nak kheng tivek pawl tulai technology thilri hmang in zingzoinak an nei. Thilri an hmanmi hrekkhat cu Moses san lai ih rak um dah mi tla a rak um ve ngaingai an mang a bang zet.

Historians hrekkhat cun Thukham 10 Thingkuang (Ark of the Covenant) hi Ethiopia, Axsum ah a um ngaingai ding an zum nan tu lai zirsang hrekkhat cun zohman ih hmuh dahlo a si ruang ah le khuahlan thilri power nei hmanrua rak hawl in an tuah dan zirnak nei ih artcilh tu Hitler ngaihven a hlawhlo ruangah a um taktak ding an zum lo.
*******************************************

Hminsin ::: Queen of Sheba hi kan Bible (I SIANGPAHRANG 10) sung ah le (2 SANSIARNAK 9) sung ah ciangzet in a lang.

***Siangpahrang Solomon hi nupi 700 (Siangpahrang phun/rimnam), nusun 300 a neih mi sung ih tamsawn cu politic, sipuaiyi, ramkhat le ramkhat rualremnak an nei thei nak ding hrang ruahsan ne ih a neih mi an si***